అంతరించిపోతున్న ఏనుగులుఆగస్టు 12న ప్రపంచ ఏనుగుల దినోత్సవం

భూమి మీద భారీ జంతువు ఏనుగు. మనిషి జీవన విధానం.. ఏనుగు జీవన విధానం దాదాపు ఒకేలా ఉంటాయి. అందరితో ప్రేమగా కలిసిపోయే ఏనుగులు భావోద్వేగాలను కలిగి ఉంటాయి. అంతేకాదు తెలివి, జ్ఞాపకశక్తి కూడా ఎక్కువే. దంతాల కోసం, ఇతర శరీర భాగాల కోసం ఏనుగులను చంపేయడంతో ఏనుగుల సంఖ్య రోజురోజుకీ తగ్గిపోతుంది. ఏనుగులకోసం ఒక దినోత్సవం ఉంటే వాటి రక్షణపై అవగాహన పెరుగుతుందన్న ఉద్దేశ్యంతో కెనడాలోని కెనజ్వెస్ట్ పిక్చర్స్ చిత్ర నిర్మాతలు ఏనుగుల సంరక్షణ ప్రచారకులు ప్యాట్రిసియా సిమ్స్, మైఖేల్‍ క్లార్క్ 2011లో ఏనుగుల రక్షణ కోసం చర్యలు ప్రారంభించారు.
థాయిలాండ్‍లోని ఎలిఫెంట్‍ రీఇంట్రడక్షన్‍ ఫౌండేషన్‍ సెక్రటరీ జనరల్‍ శివపోర్న్ దర్దరానంద మద్దతుతో ప్యాట్రిసియా సిమ్స్, ఎలిఫెంట్‍ రీఇంట్రడక్షన్ ఫౌండేషన్‍ ఆధ్వర్యంలో 2012, ఆగస్టు 12న ప్రపంచ ఏనుగుల దినోత్సవం మొదలు పెట్టారు. అప్పటి నుండి ప్యాట్రిసియా సిమ్స్ ఈ దినోత్సవానికి నాయకత్వం వహిస్తుండగా ప్రపంచవ్యాప్తంగా ఉన్న దేశాలలోని 65కి పైగా వన్యప్రాణుల సంస్థలు, చాలామంది వ్యక్తులు ఏనుగుల సంరక్షణ కోసం అనేక చర్యలు తీసుకుంటూనే ఉన్నారు.
ఆఫ్రికన్‍ ఏనుగులు ‘‘హాని కలిగించేవి’’గా, ఆసియా ఏనుగులు ‘‘అంతరించిపోతున్నవి’’ గా ఐయుసిఎన్‍ రెడ్‍ లిస్ట్ జాబితాలో చేర్చబడ్డాయి. ఆఫ్రికన్‍, ఆసియా ఏనుగులు పన్నెండు సంవత్సరాలలో అంతరించిపోతున్నాయని ఒక పరిరక్షణాధికారి చెప్పారు. ప్రస్తుతం ఆఫ్రికా ఏనుగుల సంఖ్య 4 లక్షలుండగా, ఆసియా ఏనుగులు నలభై వేలున్నాయి. ప్రస్తుత లక్ష్యం, ఆఫ్రికా, ఆసియాలోని ఏనుగుల గురించి అవగాహన కల్పించడం, అడవి ఏనుగుల రక్షణ కోసం చర్యలు తీసుకోవడం ఈ ఏనుగుల దినోత్సవ ముఖ్య లక్ష్యం..

ఈ జంతువులు ఎదుర్కొనే సమస్యలను హైలైట్‍ చేసే రోజు.. ఏనుగులు అంతరించిపోవడానికి ముఖ్యకారణాలు.. అటవీ నిర్మూలన, బందిఖానా, మానవుల దుర్వినియోగం కారణంగా నివాసాలను కోల్పోవడం, వేటాడటం ద్వారా మరణించడం. ఏనుగులు భూ పర్యావరణ వ్యవస్థను పరిరక్షించడంలో ప్రముఖ పాత్ర పోషిస్తాయి. కనుక ఏనుగులను సంరక్షించడం మానవ మనుగడకు చాలా అవసరం.
ఏనుగుల ఆవాసంగా స్థలం లేకుండా పోతుంది. కనుక జంబోస్‍ పరిరక్షణ కోసం సహజ ఆవాసాలను పునరుద్ధరించడానికి అనేక స్వచ్చంద సంస్థలు పనిచేస్తున్నాయి. అటువంటి సంస్థలకు విరాళం ఇవ్వడానికి ప్రజలు ప్రయత్నించాలి. ఏనుగు దంతాలు, ఇతర వన్యప్రాణుల ఉత్పత్తుల అక్రమ వేట, వ్యాపారాన్ని అరికట్టాలి. అడవి ఏనుగుల ఆవాసాలను రక్షించడానికి కృషి చేస్తున్న సంస్థలకు ప్రపంచ ఏనుగుల దినోత్సవ సందర్భంగా మద్దతు ఇవ్వాలని ప్రపంచ ఏనుగుల దినోత్సవం సహ వ్యవస్థాపకురాలు ప్యాట్రిసియా సిమ్స్ అన్నారు. పెంపుడు ఏనుగులు స్వేచ్ఛగా జీవించడానికి అభయారణ్యాలు, ప్రత్యామ్నాయ ఆవాసాలు ఏర్పాటు చేయాలని సూచించారు.
ప్రస్తుతం దేశంలో ఏనుగుల సంఖ్య నిరంతరం పెరుగు తుండటం సంతోషం. గత కొన్నేళ్లుగా ఏనుగుల సంఖ్య పెరుగు తుండడం సంతోషించదగ్గ విషయం. ప్రపంచంలో 50,000 కంటే ఎక్కువ ఆసియా ఏనుగులు ఉన్నాయి. ఆ ఏనుగుల జనాభాలో 60 శాతానికి పైగా భారతదేశంలోనే ఉన్నాయి. గత 10 ఏళ్లలో ఏనుగుల సంఖ్య వేగంగా పెరిగింది. ఏనుగు భారతదేశ సంస్కృతి, చరిత్రతో ముడిపడి ఉంది. భారతదేశంలో ఏనుగులను పవిత్ర జంతువులుగా పరిగణిస్తారు. ఏనుగు శాంతి, జ్ఞానానికి చిహ్నంగా కూడా పిలువబడుతుంది. హిందూమతంలో, ఏనుగు తల గల గణేశుడు అత్యంత పూజించే దేవతలలో ఒకరు. ఏ మతపరమైన ఆచారమైనా గణేశ పూజతో ప్రారంభమవుతుంది. గణేశుడి ఏనుగు రూపం తెలివితేటలకు, బలానికి, విధేయతకు ప్రతీక అని చెబుతారు.

Leave a Comment

Your email address will not be published. Required fields are marked *