ఎన్నో విషయాలను మన కళ్ల ముందు చూపించే టెలివిజన్ ప్రాముఖ్యతను తెలియజేయడానికి ప్రపంచవ్యాప్తంగా నవంబర్ 21న ప్రపంచ టెలివిజన్ దినోత్సవాన్ని నిర్వహిస్తారు. వినోద సాధనాలలో అత్యంత ముఖ్యమైనది. టెలివిజన్ సమాచార రంగంలో ఒక మహా విప్లవాన్ని తీసుకొచ్చిన సాధనం టీవీ. ఇది మనిషి ఆలోచనా తీరును, జీవన శైలిని, అభిప్రాయాలను ప్రభావితం చేసింది. దేశాల రాజకీయాల గతిని కూడా టీవీ మార్చింది. ఎందు కంటే ఇందులో ప్రసారమయ్యే వార్తలు, విశ్లేషణలు, ప్రకటనలు ఓటరు మహాశయుల మైండ్ సెట్ను ప్రభావితం చేస్తుంటాయి. వాస్తవానికి గత పదేళ్లుగా మన దేశంలో స్మార్ట్ఫోన్ వినియోగం, ఇంటర్నెట్ వినియోగం తారాస్థాయిలో పెరిగింది. ఫలితంగా టీవీల విక్రయాలు చాలావరకు తగ్గిపోయాయి. అయినా టీవీ ఉనికి మాత్రం సిటీలు, గ్రామీణ ప్రాంతాల్లో సజీవంగానే ఉంది.
ఒకప్పుడు టీవీ అంటే డబ్బు ఉన్నవారి ఇళ్లలోనే ఉండేది. కానీ మారుతున్న పరిస్థితులతో ప్రతీ ఒక్కరి ఇంట్లో టీవీ భాగమైపోయింది. టీవీ లేని ఇంటిని ఇప్పుడు చూడలేం. టెక్నాలజీ పెరిగి.. సెల్ ఫోన్ల వాడకం పెరిగినా.. టీవీలను చూసేవారూ ఉన్నారు. కచ్చితమైన సమాచారం కోసం వాటి మీదే ఆధారపడుతుంటారు. ఐక్యరాజ్యసమితి ప్రకారం, ఇది వీడియో వినియోగం కోసం, కచ్చితమైన సమచారం కోసం ఉపయోగించే వస్తువుగా కొనసాగుతోంది. ప్రపంచ టెలివిజన్ దినోత్సవం దృశ్య మాధ్యమం శక్తిని, ప్రజాభిప్రాయాన్ని రూపొందించడంలో, ప్రపంచ రాజకీయాలను ప్రభావితం చేయడంలో ఎలా సహాయపడుతుందో గుర్తుచేస్తుంది.
1996 నవంబర్ 21న ఐక్యరాజ్యసమితి మొదటి ప్రపంచ టెలివిజన్ ఫోరమ్ను నిర్వహించింది. ప్రముఖ మీడియా ప్రముఖులు ఫోరమ్లో భాగంగా పాల్గొన్నారు. ప్రపంచవ్యాప్తంగా టెలివిజన్కు పెరుగుతున్న ప్రాముఖ్యత గురించి చర్చించారు. అప్పుడే ఐక్యరాజ్యసమితి జనరల్ అసెంబ్లీ (UNGA) ప్రతి సంవత్సరం నవంబర్ 21ని ప్రపంచ టెలివిజన్ దినోత్సవంగా నిర్వహించాలని నిర్ణయించింది.
టీవీని 1924లో స్కాటిష్ ఇంజనీర్, జాన్ లోగీ బైర్డ్ కనిపెట్టారు. ఇది యునైటెడ్ నేషన్స్ ఎడ్యుకేషనల్, సైంటిఫిక్ అండ్ కల్చరల్ ఆర్గనైజేషన్ (యునెస్కో) సహాయంతో భారతదేశంలో సెప్టెంబర్ 15, 1959న న్యూ ఢిల్లీలో ప్రవేశపెట్టారు. ప్రారంభంలో భారతదేశంలో కమ్యూనిటీ హెల్త్, ట్రాఫిక్, రోడ్ సెన్స్ పౌరుల విధులు, హక్కులు వంటి వాటిపై వారంలో రెండు రోజులపాటు గంట సేపు కార్యక్రమాలు ప్రసారం చేశారు.
టెలివిజన్ దినోత్సవం
ప్రపంచ టెలివిజన్ దినోత్సవం నాడు కమ్యూనికేషన్, ప్రపంచీకరణలో టెలివిజన్ పోషిస్తున్న పాత్ర గురించి ప్రజలలో అవగాహన పెంచడానికి సమావేశాలు జరుగుతాయి. ప్రసార మాధ్యమాల పాత్రను గుర్తుచేస్తారు. రచయితలు, పాత్రికేయులు, బ్లాగర్లు, టీవీతో అనుబంధించబడే ఇతరులు నవంబర్ 21 గురించి మాట్లాడుతారు. సోషల్ మీడియాలో కంటెంట్లో వాస్తవికత సందేహాస్పదంగా ఉన్న సమయాల్లో నిష్పాక్షిక సమాచారాన్ని అందించడానికి ప్రభుత్వాలు, వార్తా సంస్థలు, వ్యక్తుల నిబద్ధతలపై కూడా ఈ రోజు చర్చిస్తారు.
- 1990వ దశకం ప్రారంభంలో కేబుల్ టీవీ ప్రసార కంటెంట్ వన్-వే ఛానల్ మాత్రమే.
- 1972లో టీవీ సేవలు రెండో అతిపెద్ద నగరమైన ముంబైలో మొదలయ్యాయి.
- 1975లో కోల్కతా, లక్నో, చెన్నై, శ్రీనగర్, అమృత్సర్లలో టీవీ స్టేషన్లను ఏర్పాటు చేశారు.
- 1975-76లో శాటిలైట్ ఇన్స్ట్రక్షనల్ టెలివిజన్ ప్రయోగం ద్వారా 2400 గ్రామాల ప్రజలకు టెలివిజన్ కార్యక్రమాలను అందుబాటులోకి తెచ్చారు.
- 2000వ దశకం ప్రారంభంలో అనలాగ్ నుంచి డిజిటల్ ప్రసారానికి టీవీ టెక్నాలజీ మారింది. దీనివల్ల సౌండ్, విజువల్ క్వాలిటీ పెరిగింది. హెచ్డీ టీవీ ఛానళ్ళు అందుబాటులోకి వచ్చాయి. పోగ్రామ్ను రికార్డింగ్ చేసుకునే వెసులుబాటు కూడా వచ్చేసింది.
- 2010 సంవత్సరం నుంచి ఓటీటీ (ఓవర్ ది టాప్) వంటి ఇంటర్నెట్ స్ట్రీమింగ్ సేవలు మొదలయ్యాయి.
- 2029 నాటికి 262.88 మిలియన్ల టీవీ సెట్లు ఉంటాయని అంచనా.
- దక్కన్న్యూస్, ఎ : 9030 6262 88
